Facebook Ki Privacy Ki Setting Karne Ka Tareeqa
Aaj kal social media hum sab ki zindagi ka ek ahm hissa ban
chuka hai. Facebook social media mein sab se mashhoor platform hai. Hum is par pictures,
videos aur khabrain waghera share karte hain.
Lekin kabhi kabhi log apni privacy ke bare mein fikarmand ho
jate hain. Aur chahte hain ke un ki Facebook ki profile sirf un logon ko hi dikhai
de jin logon ko wo jante hain.
Agar aap bhi apni Facebook ki privacy ki settings apni marzi
ke mutabiq karna chahte hain to yeh maloomati article sirf aur sirf aap ke liye
hi hai.
Yahan par aap Facebook privacy ki mukhtalif settings karna roman
Urdu mein seekhein ge.
Facebook Ki Profile Picture Aur Public Posts Ki Privacy
Privacy ki yeh setting aap ki profile picture aur posts ko
sirf aap ke doston tak mehdood kar deti hai.
Sab se pehle apni Facebook ki profile par jaein. Phir aap apni
Facebook ki profile picture par click karein.
Is ke baad "Edit Privacy" ya is tarah ka ek option ho
ga, us par click karein.
Yahan par aap ke paas do options hon ge "Friends" aur
"Only Me". Aap yahan in do mein se “Friends” ko select karein.
"Friends" ke option ko select karne se sirf aap ke Facebook ke dost
hi aap ki profile picture ko dekh saken ge.
Is ke baad bilkul isi tarah se aap apni Facebook ki public
posts ki privacy bhi "Friends" par set kar sakte hain.
Note: Jab bhi aap koi nai post karne ja rahe hon, to post
karne se pehle us ki privacy ki setting zaroor check kar len.
Facebook Ki Friends List Ko Chhupane Ka Tareeqa
Aap Facebook par apne doston ki list ko bhi chhupa sakte hain.
Facebook ka yeh feature is liye hota hai keh aap ke doston ki list har kisi ko
nazar na aaye.
Aisa karne ke liye sab se pehle apni profile par jaein. Is ke
baad "Friends" wale section par click karein.
Oper right corner mein "Manage" ya teen dots (...)
ka nishan ho ga. Pehle is par click karein aur phir "Edit Privacy" ke
option par click karein.
Yahan "Who can see your friends list?" ke option ke
saamne "Only Me" ya "Friends" ka option select kar len.
Ab aap ke doston ki list ko har koi nahin dekh sake ga.
Facebook Posts Ki Audience Set Karne Ka Tareeqa
Aap Facebook par yeh bhi set kar sakte hain ke jab bhi aap
koi nai post karen to us ko kon kon dekh sake ga.
Is ke liye sab se pehle Facebook ki "Settings &
Privacy" mein jaein. "Privacy Shortcuts" ya "Privacy
Settings" par click karen.
Yahan "Who can see my future posts?" wale option
par click karen. Is par click karne ke baad aap ke samne kuch options hon ge.
Yahan se aap "Friends", "Only Me" ya koi
aur option select kar sakte hain.
"Friends" ke option ko select karne se aap ki tamam
nai posts ko sirf aap ke dost hi dekh saken ge.
Facebook Activity Log Istemal Karne Ka Tareeqa
Facebook mein “Activity Log” aap ko aap ki Facebook ki tamam
activities dikhata hai. Aap wahan se bhi apni purani posts ki privacy ko update
kar sakte hain.
Is ke liye apni Facebook ki profile par jaen. Is ke baad
"View Activity Log" par click karein.
Left side par "Posts" ya "Your Posts" ka
option ho ga. Is par click karein.
Har post ke samne aap ko ek privacy icon dikhai de ga. Is icon par click kar ke aap apni marzi ki privacy setting kar sakte hain.