Facebook Ki Kuch Zaroori Settings Karne Ka Tareeqa
Kya aap jaante hain ke Facebook mein kuch aisi zaroori
settings bhi hoti hain jin ki madad se aap apna Facebook ka account aur bhi
behtar aur mehfooz bana sakte hain?
Is page par aap Facebook ki kuch zaroori aur buniyadi
settings karna roman Urdu mein seekhein gay.
1. Security Aur Login
Facebook account ki security bohat zaroori hoti hai. Yeh is
liye keh koi aur aap ke account ko misuse na kar sake.
Two-Factor Authentication
Is ko aap “Do-Marhala Tasdeeq” bhi keh sakte hain. Yeh ek
bohat hi ahm security feature hai. Is ko “On” karne se agar koi shakhs aap ke
password ke sath “Log in” karne ki koshish kare ga to aap ke mobile phone par ek
code aaye ga. Is code ke baghair woh shakhs “Log in” nahin kar paye ga.
Is ko “On” karne ke liye "Settings & Privacy"
mein jaen. Phir "Security and Login" par click karein aur phir "Use
two-factor authentication" ko set up karein.
Where You're Logged In
Is ka matlab hai “Aap Kahan Logged In Hain”. Is section mein
aap dekh sakte hain ke aap ka Facebook account kin devices par aur konsi
locations par ‘Logged in’ hai. Agar aap ko koi aisi activity nazar aaye jo aap
ne nahin ki to aap wahan se us session ko end kar sakte hain.
Password Tabdeel Karte Rahein
Thore thore waqt ke baad apna Facebook ka password badalte
rehna chahiye. Hamesha ek mazboot password ko chunein jis mein numbers, letters
aur symbols shaamil hon. Agar aap ko Facebook account ka password change karne
ka tareeqa nahin maloom to aap yahan parh sakte hain “Facebook Ka PasswordKaise Change Karte Hain?”.
2. Notifications
Facebook par koi ek nahin balkeh be-shumar notifications aate
rehte hain jo kabhi kabhi pareshan kun ho sakte hain. Aap in notifications ko
apni zaroorat ke mutabiq adjust kar sakte hain.
Notification Ki Settings Karna
"Settings & Privacy" mein
"Notifications" par click karein. Yahan aap har tarah ke
notifications ki apni zaroorat ke mutabiq settings kar sakte hain. Aap yeh bhi decide
kar sakte hain ke aap ko yeh notifications Facebook par, email par ya SMS ke
zariye milen ya nahin.
Push Notifications Ki Settings Karna
Agar aap Facebook app istemal karte hain to aap push
notifications ki bhi settings kar sakte hain. Aap choose kar sakte hain ke aap
ko kin kin cheezon ke notifications milen aur kin kin cheezon ke nahin.
3. Profile Aur Tagging
In settings ki madad se aap yeh control kar sakte hain keh
aap ki profile par kya dikhai de aur kya nahin aur aap ko photos aur posts mein
kon kon tag kar sakta hai aur kon kon nahin kar sakta.
Who can post on your profile?
Is ka matlab hai keh “Aap ki profile par kon post kar sakta
hai?”. Is setting mein aap ko yeh decide karna hota hai keh aap ki “Timeline” par
sirf aap hi post kar saken gay ya aap ke dost bhi.
Review posts you're tagged in before they appear on your profile?
Is ka matlab hai “Jin posts mein aap ko tag kiya gaya hai un
posts ko apni profile par zahir hone se pehle review karein?”
Is setting ko “On” karne se agar koi aap ko kisi photo ya
post mein tag karta hai to woh pehle sirf aap ko dikhai de gi. Phir aap decide
kar sakte hain ke aap usay apni profile par show karna chahte hain ya nahin.
Who can see posts you're tagged in on your profile?
Is ka matlab hai keh “Aap ki profile par jin posts mein aap
ko tag kiya gaya hai un ko kon dekh sakta hai?. Aap yeh bhi set kar sakte hain
ke jin posts mein aap tagged hain un posts ko aap ke dost dekhein ya nahin.
4. Language Aur Region
Is ka matlab hai Zuban aur Ilaqa. Agar aap English ki jagah apni
pasand ki zuban mein Facebook istemal karna chahte hain to aap is setting ko
change kar sakte hain.
Zuban Ki Setting
"Settings & Privacy" mein ja kar "Language"
par click karein aur apni pasand ki zuban ko select karein.
Region Format
Aap date aur time ka format bhi apni region ke mutabiq set
kar sakte hain.
Yeh kuch bohat hi zaroori Facebook ki settings hain. In settings ko adjust kar ke aap apna Facebook ka experience aur bhi acha bana sakte hain. Apni Facebook ki privacy aur security ko maintain rakhne ke liye in settings ko regularly review karte rahein.