WhatsApp Ko Update Karne Ka Tarika
Kya aap apne WhatsApp ko update karna chahte hain? Is waqt
shayed hi koi aisa mobile ho ga jis mein WhatsApp ki app na ho. Doston aur
rishtedaaron se baat cheet karni ho ya official communication karni ho,
WhatsApp har jagah aap ki madad karta hai.
Is liye, WhatsApp ko updated rakhna bohat zaroori hota hai. Taakeh
aap WhatsApp ke latest features aur security enhancements se faida utha saken.
WhatsApp Ko Update Kyun Karte Hain?
WhatsApp ko update karne ke kai faide hain:
Cyber attacks se bachne ke liye apps ko update karna bohat zaroori hota hai. Update karne se in apps ki security behtar hoti hai.
Agar aap ke WhatsApp mein koi problem aa rahi hai to update karne se aksar aisi problem theek ho jati hai.
Updated versions aksar app ki performance ko behtar banate hain.
WhatsApp Ko Android Mobile Mein Update Kaise Karte Hain?
Android phone mein WhatsApp ko update karna bohat hi aasan hota
hai. Bas in steps ko follow karen:
Google Play Store Ke Zariye Update Karne Ka Tarika
Apne phone mein Google Play Store app ka icon dhoondhen aur
us par tap karen.
Google Play Store mein oper search bar mein "WhatsApp"
type karen aur search karen. Jab search results mein WhatsApp Messenger nazar
aaye to us par tap karen.
Agar koi update available ho gi to aap ko "Update"
ka button nazar aaye ga. Us par tap karen.
Update download aur phir install hona shuru ho jaye gi. Is
mein thora waqt bhi lag sakta hai. Yeh aap ke internet ki speed par bhi munhasir
hai.
Jab update complete ho jaye to aap WhatsApp ko open karke
naye features istemal kar sakte hain. Aap ka WhatsApp update ho chukka hai.
Automatic Updates On Karne Ka Tarika
Agar aap chahen to aap “Automatic Updates” ko bhi enable kar
sakte hain. Is ka yeh faida ho ga keh aap ko har baar manually WhatsApp ko update
nahin karna pare ga.
Is ke liye Google Play Store ko open kar ke top right corner
mein apni profile picture par tap karen. Phir "Settings" par tap
karen.
Ab "Network Preferences" par tap karen. Yahan par
aap ko "Auto-update apps" ka option mile ga. Is par tap karen.
Aap ko yahan do options diye jayen gay.
- Over Wi-Fi only
- Over any Network
Aap in mein se kisi ek ko choose kar sakte hain. Wi-Fi only
behtar hai. Ab aap ka WhatsApp khud-ba-khud update ho jaye ga.
WhatsApp Ko iPhone Par Update Kaise Karte Hain?
iPhone users ke liye bhi WhatsApp ko update karne ka process
kafi milta julta hi hai.
App Store Ke Zariye Update Karne Ka Tarika
Apne iPhone mein App Store app ka icon dhoondhen aur us par
tap karen.
Screen ke neechay right side mein "Updates" tab par
tap karen. Agar aap ko yeh tab nazar nahin aa raha to search bar mein
"WhatsApp" type kar ke bhi dhoondh sakte hain.
Updates ki list mein WhatsApp Messenger ko dhoondhen. Agar
koi update available ho gi to WhatsApp ke samne "Update" ka button ho
ga. Us par tap karen.
Update download aur phir install hona shuru ho jaye gi. Update
mukammal hone ke baad aap WhatsApp ko khol kar naye features istemal kar sakte
hain.
iPhone Par Automatic Updates On Karne Ka Tarika
Apne iPhone ki "Settings" app ko open karein.
Thora scroll down kar ke "App Store" par tap karen. Yahan par aap ko "App Updates" ka toggle mile ga. Is ko on kar den. Ab aap ki WhatsApp ki app khud-ba-khud update ho jaye gi.