InPage Mein File Ko “Save” Aur “Save As” Karne Ka Tarika
Urdu documents banane ke liye InPage ek zabardast tool hai. Is
mein kaam karte waqt apni files ko save karna bohat zaroori hota hai taake aap
ka document ya file zaya na ho. Aaj aap roman Urdu mein InPage mein file ko
“Save” aur “Save As” karna seekhein gay.
InPage mein file ko save karne ke 2 tareeqay hote hain:
- Save
- Save As
Aaiye, in dono tareeqon ko tafseel se dekhte hain.
InPage Mein File Ko Save Karna
Jab aap InPage mein koi naya document banate hain ya kisi mojooda
document mein koi tabdeeli karte hain to us tabdeeli ko mehfooz karne ke liye
"Save" ka option istemal kiya jata hai.
InPage Mein File Ko “Save” Karne Ka Tarika
Is ke liye sab se pehle InPage window ke oper left corner par
mojood "File" menu par click karein. "File" menu mein aap
ko "Save" ka option nazar aaye ga. Is par click karein. “Save” par
click karne se aap ki file save ho jaye gi.
Aap InPage mein file ko save karne ke liye “Ctrl + S” short
key bhi istemal kar sakte hain.
Naya Document Save Karte Waqt
Agar aap pehli baar koi naya document save kar rahe hain to
"Save" par click karne se "Save As" ka dialog box open ho
ga. Is mein aap ko chand cheezen specify karni hon gi.
Location (Jagah)
Sab se pehle aap us jagah (folder) ka intikhaab karein jahan
aap apni file ko save karna chahte hain. Aap is file ko desktop, My Documents
ya kisi aur drive mein folder select karke save kar sakte hain. Aap jis folder
ko select karen gay aap ki file usi folder mein save ho gi.
File Ka Name
"File Name" field mein apni file ka naam likhein.
Save as Type
Aam tor par yeh "InPage Document (*.INP)" hi hota
hai aur aap ko isay tabdeel karne ki zaroorat nahin hoti.
Save Ka Button
Location aur file name ko choose karne ke baad "Save"
ke button par click kar dein. Aap ki file aap ki select ki hui jagah par save
ho jaye gi.
Baad Mein Save Karte Waqt
Ek baar file save hone ke baad, jab aap is mein koi mazeed
tabdeeli karte hain, to dobara "File" menu mein ja kar
"Save" par click karne ya “Ctrl + S” ko dabane se aap ki nayi
tabdeeliyan usi file mein save ho jayen gi.
InPage Mein File Ko “Save As” Karna
"Save As" ka option us waqt istemal kiya jata hai
jab aap kisi mojooda file ki duplicate copy banana chahte hon ya usay kisi naye
naam ya kisi aur jagah par save karna chahte hon.
InPage Mein File Ko “Save As” Karne Ka Tarika
InPage window ke oper left corner par mojood "File"
menu par click karein. Is "File" menu mein "Save As" ka
option mojood hota hai. Is par click karein.
"Save As" par click karne se "Save As"
dialog box open ho ga. Yeh bilkul waisa hi “Save Document As” ke naam se dialog
box hota hai jaisa file ko pehli baar "Save" karte waqt aap ne dekha
tha.
Agar aap apni file ki duplicate copy banane ja rahe hain to ab
aap yahan par file ke liye naya naam likh sakte hain. Agar aap ne file ki jagah
tabdeel karni hai to aap kisi aur folder ya drive mein save kar sakte hain.
File ka naya naam ya location select karne ke baad
"Save" ke button par click kar dein.
"Save As" Kab Istemal Karein?
Duplicate Copy
Agar aap ne ek document banaya hai aur ab aap usi ki tarah ka
ek aur document banana chahte hain lekin original file ko bhi mehfooz rakhna
chahte hain to "Save As" ka istemal karein.
Different Format
Agar aap ko kisi khaas version mein file tayar karni ho, to InPage
mein "Save As" ke zariye aap file ko mukhtalif formats mein bhi save
kar sakte hain.
Backup
Kabhi kabhi log apni files ka backup banane ke liye bhi
"Save As" ka istemal karte hain. Yeh log files ko kisi aur drive ya
external storage mein save kar lete hain.
InPage mein "Save" aur "Save As" dono hi bohat ahm functions hain. InPage par kaam karte hue aap ko in dono ki zaroorat parhti rehti hai.