InPage Mein Naya Document Banane Ka Tarika
Agar aap InPage software ko seekhne ja rahe hain. Ya koi naya
project shuru karna chahte hain to sab se pehla qadam hota hai ek naya document
banana.
InPage mein naya document banana bohat hi aasan hai. Yahan aap
ke liye bilkul aasan tareeqe diye gaye hain jin ki madad se aap InPage mein ek
naya document bana sakte hain.
"File" Menu Ka Istemal Karke Naya Document Banana
Yeh sab se aam aur seedha tareeqa hai naya document banane
ka.
Sab se pehle apne computer mein InPage software ko
double-click karke ya start menu se open karein. InPage window ke oper jo menu
bar hai us mein aap ko "File" ka option nazar aye ga. Is par click
karein.
Ab aap ke saamne "File" menu open ho ga. Aap ko yahan
“New” ke naam se ek option nazar aye ga. Is option par click karein.
"New" par click karne ke baad "New Document"
ke naam se ek dialog box khule ga. Is mein aap apne naye document ki mukhtalif
settings set kar sakte hain.
Page Size
Is option mein aap apne document ke page ka size choose kar
sakte hain. Jaise keh A4, Letter, Legal waghera. Aam tor par “A4” size istemal kiya
jata hai.
Page Width
Agar aap koi custom size chahte hain to yahan page ki chorai
(width) enter kar sakte hain.
Page Height
Bilkul isi tarah, agar aap custom size chahte hain to yahan
page ki lambai (height) enter kar sakte hain.
Orientation
Yahan se aap page ki simt choose kar sakte hain. Is mein aap
ke paas do options hote hain "Portrait" aur "Landscape".
Number of Columns
Agar aap apne text ko columns mein divide karna chahte hain
to yahan columns ki tadad (number) enter karein.
Column Gutter
Agar aap ne ek se zyada columns muntakhab kiye hain to yahan
un ke darmiyan ka fasla (space) apni zaroorat ke mutabiq set karein.
Margins
Yahan aap page ke chaaron taraf (top, bottom, left, right)
kitni kitni khaali jagah (margin) chhorna chahte hain woh enter karein.
"OK" Par Click Karein
Apni zaroorat ke mutabiq tamam settings enter karne ke baad
"OK" ke button par click kar dein. Ab ek naya aur blank document
InPage mein open ho jaye ga.
Keyboard Shortcut Ka Istemal Karke Naya Document Banana
InPage mein naya (new) document banane ke liye ek shortcut
key bhi hai. “Ctrl + N” wo shortcut hai jo aap InPage software mein ek naya
document banane ke liye istemal kar sakte hain.
Yeh shortcut dabane se "New Document" ka dialog box foran open ho jaye ga. Aap oper bataye gaye tareeqe ke mutabiq phir naye document ki settings set kar sakte hain.