Pakistan Mein PayPal Account Kaise Banate Hain?
Online paise bhejna aur mangwana aaj ke daur mein bohat ahm
aur zaroori ho gaya hai. Is kaam ke liye PayPal ek intihai maqbool aur qabil-e-etemad
platform hai.
Agar aap Pakistan mein rehte hain aur PayPal account banana
chahte hain to yeh guide aap ki is kaam mein mukammal madad kare gi.
Kya Pakistan Mein PayPal Directly Available Hai?
Sab se pehle yeh jaan lena bohat zaroori hai keh PayPal
Pakistan mein officially available nahin hai.
Is ka matlab hai keh aap directly Pakistan se PayPal ka account
nahin bana sakte aur na hi kisi Pakistani bank account ko is se link kar sakte
hain. Lekin, is ka yeh matlab hargiz bhi nahin hai keh aap PayPal ki services
se bilkul bhi faida nahin utha sakte.
Kuch aise alternatives aur workarounds mojood hain jin ki
madad se Pakistani users bhi PayPal ko istemal kar sakte hain.
Pakistan Mein PayPal Account Banane Ke Alternatives
Jesa keh aap shuru mein hi jaan chuke hain keh Pakistan mein
PayPal available nahin hai is liye agar aap Pakistan mein rehte hue hi PayPal
ko istemal karna chahte hain to aap ko kuch doosre tareeqon par ghaur karna ho
ga.
Kisi Dost Ya Rishtedar Ki Madad
Yeh sab se aam aur reliable tarika hai. Agar aap ka koi dost
ya rishtedar kisi aise mulk mein rehta hai jahan PayPal available hai to aap us
ki madad le sakte hain.
Aap us se darkhwast kar sakte hain keh woh apne naam par
PayPal ka ek account banaye aur aap ko us account tak rasai (access) de. Is
tarah aap Pakistan mein rehte hue hi PayPal ka account istemal kar saken ge.
Faida
Yeh tarika sab se mehfooz, aasan aur seedha hai. Aap ko
account ki verification ya funds receive karne mein koi masla nahin ho ga.
Nuqsan
Is tareeqe mein aap ko apne dost ya rishtedar par bharosa
karna ho ga.
Freelancing Platforms Ke Zariye PayPal Ka Istemal
Agar aap online freelancing karte hain to bohat si websites
jaise keh Fiverr, Upwork, Freelancer.com waghera aap ko PayPal ke zariye
payments receive karne ka option deti hain.
Be-shak aap Pakistan mein hi rehte hon. Yeh platforms aap ke
liye ek intermediary ka kaam karte hain. Yeh khud PayPal se payments receive
karte hain aur phir aap ko doosre tareeqon jaise keh Payoneer ya bank transfer
waghera se paisay bhejte hain.
Faida
Aap ko apna PayPal ka account banane ki zaroorat nahin parti.
Nuqsan
Aap sirf un platforms se payments le sakte hain jo PayPal ko support
karte hain aur funds transfer mein fees bhi lag sakti hai.
Kisi Third Party Ki Services
Is silsile mein kuch third-party services bhi hain jo aap ko
PayPal ki payments receive karne mein madad deti hain. Yeh services aksar apni
fees leti hain.
Lekin in ka istemal thora risky ho sakta hai. In services
mein virtual bank accounts ya virtual PayPal accounts shaamil ho sakte hain.
Faida
Agar aap ke paas koi aur option na ho to yeh ek hal ho sakta
hai.
Nuqsan
Is tareeqe mein fees zyada ho sakti hai aur in ki reliability
kuch zyada yaqeeni nahin hoti. Fraud ka khatra bhi zyada hota hai.
Directly PayPal ka account Pakistan mein banana abi tak mumkin nahin hai. Ho sakta hai keh kuch dair baad aisa mumkin ho sake. Tab tak aap in mein se koi ek tarika choose kar ke apni payments receive aur send kar sakte hain.
0 Comments
Post a Comment