Facebook Account Ko Delete Karne Ka Tareeqa
Kya aap apna Facebook account delete karna chahte hain? Baaz-auqaat
kuch wajohaat ki bina par logon ko apna Facebook account delete karna ki
zaroorat parh jati hai.
Agar aap bhi un logon mein se ek hain jo apna Facebook
account permanently delete karna chahte hain to yeh maloomat aap ke liye hi
hai. Aaj aap Facebook account ko “Delete” ya “Deactivate” karne ka tareeqa
seekhein gay.
Note: Yeh yaad rahe ke account delete karne ke baad aap apni
tamam maloomat, tasweerein aur posts wapis haasil nahin kar saken gay.
Data Ka Backup (Agar Aap Ko Zaroorat Ho To)
Account delete karne se pehle, agar aap apni photos, videos
ya is tarah ka koi data mehfooz rakhna chahte hain to us ka backup zaroor bana
len. Facebook ki taraf se aap ko yeh option diya jata hai.
Aap "Settings & Privacy" mein jaa kar
"Your Facebook Information" aur phir "Download Your
Information" par click kar ke apna data download kar keh mehfooz rakh sakte
hain.
Facebook Account Ko Delete Karne Ka Tareeqa
Facebook account ko delete karne ke 2 options hote hain:
- Deactivate Karna
- Permanently Delete Karna
Agar aap sirf kuch waqt ke liye Facebook se door rehna chahte
hain to phir “Deactivate” karne ka option aap ke liye behtar rahe ga. Is mein
aap baad mein phir se login kar sakte hain.
Lekin agar aap hamesha hamesha ke liye apna Facebook ka account
khatam karna chahte hain to phir delete ka option aap ke liye behtar ho ga.
Permanently Delete Karne Ka Tareeqa
Sab se pehle apne computer ya mobile mein Facebook ko open
karein aur apne account mein login karein. Is ke baad right side par dropdown ke
nishan (▾) par click
karein aur "Settings & Privacy" ko select karein. Ab
"Settings" par click karein.
Settings ke page par left side mein mukhtalif options mein se
"Your Facebook Information" par click karein.
"Your Facebook Information" mein aap ko kai options
nazar ayen gay. In mein se "Deactivation and Deletion" ko dhoondhein
aur us ke saamne diye gaye "View" ke button par click karein.
Ab aap ke paas 2 options hon gay. Pehla "Deactivate
Account" aur doosra "Delete Account". Apna account permanently
delete karne ke liye "Delete Account" ke option ko select karein aur
phir "Continue to Account Deletion" par click karein.
Agle page par Facebook ki taraf se aap ko kuch maloomat di
jaye gi. Aap se wajah bhi poochhi ja sakti hai keh aap account kyun delete kar
rahe hain.
Aap chahen to koi wajah select kar sakte hain. Agar nahin to
phir "Continue to Account Deletion" par click karein.
Aakhri screen par aap ko ek baar phir bataya jaye ga ke
account delete karne ke baad kya ho ga aur aap ki maloomat wapis nahin mile gi.
Apne Facebook ke account ko hamesha hamesha ke liye delete karne ke liye
"Delete Account" par click karein.
Yahan Facebook ki taraf se aap se aap ka password enter karne
ko kaha jaye ga. Apna password likh kar "Continue" par click karein.
Is ke baad ek final message aap ke samne ho ga. Yahan "Delete
Account" par click karne ke baad, aap ke Facebook account ko delete karne
ka process shuru ho jaye ga.
Facebook Account Delete Hone Mein Kitna Waqt Lagta Hai?
Facebook account ko delete karne ki request ke baad taqreeban 30 din ka waqt lag sakta hai. Is dauran agar aap apne Facebook account mein phir se login karte hain to account ka delete hone ka process cancel ho jaye ga.