Facebook Par Block Aur Unblock Karne Ka Aasan Tareeqa
Facebook ek bohot bara social media platform hai. Hum is ki
madad se apne doston, rishte-daroon aur jananay walon se rabtay mein rehte
hain.
Lekin baaz-auqaat aisa bhi hota hai ke humein kisi wajah se
kisi shakhs ko block karne ki zaroorat par jati hai. Facebook par block karne
ka matlab yeh hai keh jis ko aap block karte hain woh shakhs aap ki profile
nahin dekh sake ga, aap ko message nahin kar sake ga aur na hi aap ko friend
request bhej sake ga.
Agar aap kisi ko block karna chahte hain ya ghalti se kisi ko
block kar diya hai to usay unblock karna bhi bohot aasan hai. Aaj aap yahan roman
Urdu alfaz mein Facebook par kisi ko block aur unblock karna seekhen gay.
Facebook Par Kisi Ko Block Karne Ka Tareeqa
Sab se pehle us shakhs ki profile par jayen jisay aap block
karna chahte hain. Aap us ka naam search bar mein likh kar talash kar sakte
hain ya apni friend list mein dhoond sakte hain.
Us shakhs ki profile par pohanch kar, aap ko teen nuqton wala
ek menu (⋮) nazar
aaye ga. Yeh aam tor par profile picture ke neeche ya cover photo ki right side
mein hota hai. Iss par click karen.
Is menu mein aap ko mukhtalif options nazar ayen ge. In mein
se "Block" ke option ko talash karen aur is par click karen.
Is ke baad ek pop-up window aap ke samne open ho gi. Is mein
aap se poocha jaye ga keh kya aap waqai is shakhs ko block karna chahte hain.
Is mein block karne ke nataij bhi bataye jayen ge.
Yahan aap "Block" ke button par click kar ke apni
tasdeeq karen.
Mubarak ho! Aap ne is shakhs ko kamyaabi se block kar diya
hai. Ab woh shakhs aap ki profile nahin dekh sake ga aur na hi aap se raabta
kar sake ga.
Facebook Par Kisi Ko Unblock Karne Ka Tareeqa
Agar aap ne kisi ko ghalti se block kar diya hai aur ab aap us
ko unblock karna chahte hain. Ya pehle aap ne kisi ko block kiya tha aur ab aap
us ko unblock karna chahte hain. Aap bilkul aasani se kisi ko unblock kar sakte
hain. Is ke 2 tareeqe hote hain:
Settings Ke Zariye Unblock Karna
Facebook ko open karen aur ooper right side mein 3 lakeeron
wala menu (☰) aap ko
nazar aye ga. Is par click karen.
Neeche ki taraf scroll karen aur "Settings &
Privacy" par click karen. Ek aur menu open ho ga. Is mein "Settings"
ke option par click karen.
Left side mein aap ko mukhtalif options ki ek fehrist (list)
nazar aaye gi. Is mein "Blocking" ya “Block” ka option bhi ho ga. Wahan
is option ko talash karen aur is par click karen.
Yahan aap ko un tamam logon ki ek fehrist (list) nazar aaye
gi jin ko aap ne block kiya hua hai. Jis shakhs ko aap unblock karna chahte
hain, us ke naam ke samnay "Unblock" ka button mojood ho ga. Is par
click karen.
Ek pop-up window zaahir ho gi. Yeh aap se unblock karne ki
tasdeeq mangay gi. Is window mein "Unblock" par click kar ke apni
tasdeeq karen.
Ab woh shakhs unblock ho chuka hai aur dobara aap ki profile
dekh sakta hai aur aap se raabta kar sakta hai.
Search Ke Zariye Unblock Karna
Facebook ke search bar mein sab se pehle us shakhs ka naam
likhen jis ko aap ne block kiya tha.
Search ke results mein us shakhs ki profile talash karen.
Us ki profile par jayen. Agar aap ne us ko block kiya hua hai
to aap ko profile picture ki jagah par ek paigham nazar aaye ga. Is mein likha
ho ga ke aap ne is shakhs ko block kiya hua hai.
Is paigham ke sath hi "Unblock" ka ek button bhi mojood
ho ga. Is button par click karen.
Ek tasdeeqi window open ho gi. Is mein "Unblock"
par click karen. Woh shakhs ab unblock ho jaye ga.
Facebook par kisi ko “Unblock” karne ke donon tareeqe bilkul hi aasan hain. Aap apni zaroorat ke mutabiq kisi tareeqe ko select kar sakte hain.